ಪೃಥಿವೀ... ಧೈರ್ಯಾಭಿವೃದ್ಧಿಗಾಗಿ ಈ ಮಂತ್ರ ಪಠಿಸಿ

 ಪೃಥ್ವಿ ತ್ವಯಾ ಧೃತಾ ಲೋಕಾಃ ದೇವಿ ತ್ವಂ ವಿಷ್ಣುನಾ ಧೃತಾ |
 ತ್ವಂ ಚ ಧಾರಯ ಮಾಂ ದೇವಿ ವಿಷ್ಣುಪತ್ನಿ ನಮೋಸ್ತು ತೇ ||

ಎಲೈ ಪೃಥಿವಿಯೇ, ನಿನ್ನಿಂದ ಲೋಕಗಳೆಲ್ಲವೂ ಧರಿಸಲ್ಪಟ್ಟಿರುತ್ತವೆ. ಎಲೈ ಪೃಥ್ವಿ ದೇವಿಯೇ, ನೀನು ವಿಷ್ಣುವಿನಿಂದ ಧರಿಸಲ್ಪಟ್ಟಿರುತ್ತೀಯೆ. ಇಂಥ ನೀನು, ಎಲೈ ಭೂದೇವಿಯೇ, ನನ್ನನ್ನು ಧರಿಸು, ಕಾಪಾಡಮ್ಮ; ವಿಷ್ಣುಪತ್ನಿಯೇ ನಿನಗೆ ನಮಸ್ಕಾರ.

ತಾತ್ಪರ್ಯಾರ್ಥ: ಇದೊಂದು ಭೂದೇವತಾಸ್ತೋತ್ರ. ಇಲ್ಲಿ ಭೂದೇವಿಯನ್ನು ಸ್ತುತಿಸಿ, ಭೂದೇವಿಗೆ ನಮಸ್ಕಾರವನ್ನೂ ತಿಳಿಸಿದೆ. ಇದರ ಸ್ವಾರಸ್ಯವನ್ನು ನೋಡೋಣ:

ಭೂದೇವಿಯು ಸಕಲ ಪ್ರಾಣಿಗಳನ್ನೂ ಧರಿಸಿರುತ್ತಾಳೆ. ಮನುಷ್ಯರು, ಪಶು ಪಕ್ಷಿಗಳು, ಕ್ರಿಮಿಕೀಟಗಳು, ಗಿಡಮರಗಳು, ಬೆಟ್ಟಗುಡ್ಡಗಳು-ಇವೆಲ್ಲವೂ ನಿಂತಿರುವುದು ಭೂಮಿಯ ಮೇಲೆಯೇ. ಭೂಮಿಯೇ ಇವೆಲ್ಲವನ್ನೂ ಧರಿಸಿರುತ್ತಾಳೆ. ಭೂಕಂಪವಾದರೆ ಇಡೀ ಜಗತ್ತೇ ನಾಶವಾಗಿಬಿಡುತ್ತದೆಯಲ್ಲವೇ? ಹಾಗಾಗದಂತೆ ಭೂತಾಯಿಯು ತಾಳ್ಮೆಯಿಂದ ಜಗತ್ತನ್ನೆಲ್ಲ ಧರಿಸಿರುತ್ತಾಳೆ. ಹೀಗಾಗಿ ಸಕಲಪ್ರಾಣಿಗಳಿಗೂ ಭೂತಾಯಿಯೇ ಆಧಾರವಾಗಿರುತ್ತಾಳೆ.

ಇಂಥ ಭೂಮಿಯನ್ನು ಶ್ರೀಮಹಾವಿಷ್ಣುವು ಧರಿಸಿರುತ್ತಾನೆ. ಭೂಮಿಯು ಇಷ್ಟೊಂದು ಭದ್ರವಾಗಿ ನಿಂತಿರುವುದು ಮಹಾವಿಷ್ಣುವಿನಿಂದಲೇ. ಮಹಾವಿಷ್ಣುವು ವರಾಹಾವತಾರವನ್ನು ಮಾಡಿ, ಸಮುದ್ರದೊಳಗೆ, ರಸಾತಳದಲ್ಲಿ ಮುಳುಗಿದ್ದ ಭೂಮಿಯನ್ನು ಮೇಲಕ್ಕೆ ತಂದನಲ್ಲವೇ? ಅಂದಮೇಲೆ, ಎಲೈ ಭೂದೇವಿಯೇ, ವಿಷ್ಣುವು ನಿನ್ನನ್ನು ಧರಿಸಿರುತ್ತಾನೆ.

ಇಂಥ ನೀನು, ಭೂಮಿತಾಯಿಯೇ, ನನ್ನನ್ನು ಕಾಪಾಡು; ನೀನು ಮಹಾ ವಿಷ್ಣುವಿನ ಪತ್ನಿಯೂ ಆಗಿದ್ದೀಯೆ. ನನಗೆ ಭೂಮಿಯಿಂದ ಯಾವ ಅಪಘಾತಾದಿಗಳೂ ಆಗದಂತೆ, ನನಗೆ ಅಪಮೃತ್ಯು ಬಂದೊದಗಂತೆ ನನ್ನನ್ನು ಕಾಪಾಡು, ತಾಯಿ. ನಾನು ಈ ಭೂಲೋಕದಲ್ಲಿ ಶತಮಾನ ಸಂವತ್ಸರಗಳು ಆನಂದವಾಗಿರುವಂತೆ ನನ್ನನ್ನು ಹರಸು, ತಾಯಿ; ಮಹಾವಿಷ್ಣುವಿನ ಪ್ರಿಯಪತ್ನಿಯಾಗಿರುವ ನಿನಗೆ ನನ್ನ ಅನಂತಾನಂತ ಭಕ್ತಿ ಪ್ರಣಾಮಗಳು.

ಧೈರ್ಯಾಭಿವೃದ್ಧಿಗಾಗಿ ಈ ಸ್ತೋತ್ರವನ್ನು ಪಠಿಸಬೇಕು.

(ಕೃಪೆ:ಮಕ್ಕಳಿಗಾಗಿ ಸ್ತೋತ್ರಗಳು)