ಆರೋಗ್ಯ ಜ್ಯೋತಿಷ್ಯ

 ಆರೋಗ್ಯ

ಯಾರೊಬ್ಬರ ಆರೋಗ್ಯದ ವಿಷಯವಾಗಿ ಅವರ ಮೂಲ ಜಾತಕದೊಂದಿಗೆ ಗೋಚಾರೀ ಗ್ರಹಗಳ ಪರಿಭ್ರಮಣದ ಪರಿಣಾಮ ಹಾಗೂ ಮಹರ್ದಶೆ, ಅಂತರ್ದಶೆಗಳ ಪ್ರಭಾವವನ್ನು ತುಲನಾತ್ಮಕವಾಗಿ ಪರಿಶೀಲಿಸಬೇಕು. ಏಕೆಂದರೆ ಅವರ ಮೂಲ ಜಾತಕದ ಪ್ರಕಾರ ಆರೋಗ್ಯ ಭಾಗ್ಯವನ್ನು ಪಡೆದುಕೊಂಡು ಬಂದಿರುವರೇ ಹೇಗೆ ಎಂಬುದನ್ನು ಖಚಿತ ಪಡಿಸಿಕೊಳ್ಳಬೇಕು. ಜಾತಕನು ಯಾವ ಸಂಗತಿಗಳನ್ನು (ಭಾವಗಳು) ಜನ್ಮಾರಭ್ಯ ಸಂಸ್ಕಾರ ರೂಪದಿಂದ ಇಲ್ಲವೋ ಅದು ಗೋಚರಿ ಗ್ರಹಗಳು ಎಷ್ಟೇ ಶುಭದಾಯಕವಾಗಿದ್ದರೂ ಮಹರ್ದಶೆ ಅಂತರ್ದಶೆಗಳು ಶುಭರಿದ್ದಾಗ್ಯೂ ಫಲ ಮಾತ್ರ ದೊರೆಯುವದಿಲ್ಲ. 

ಇದರಂತೆ ಯಾವುದರ ಬಗೆಗೆ ಲವಲೇಶವಾದರೂ ಕಡಿಮೆ ಇಲ್ಲವೋ ಅದು ಗೋಚಾರೀ ಗ್ರಹಗಳು ಎಷ್ಟೇ ಅಶುಭವಿದ್ದರೂ ಹಾಗೂ ಮಹರ್ದಶೆ ಅಂತರ್ದಶೆಗಳು ಅಶುಭವಿದ್ದರೂ ಆ ವಿಷಯದ ಬಗೆಗೆ ಆ ಭಾವಗಳ ಬಗೆಗೆ ಸ್ವಲ್ಪವೂ ಕೂಡ ಕಡಿಮೆ ಆಗಲಾರದು. ಈ ದೃಷ್ಟಿಯಿಂದ ಗೋಚಾರೀ ಗ್ರಹಗಳ ಪರಿಭ್ರಮಣದ ಪರಿಣಾಮ ಹಾಗೂ ಮಹರ್ದಶೆ ಅಂತರ್ದಶೆಗಳ ಪ್ರಭಾವವನ್ನು ತುಲನಾತ್ಮಕವಾಗಿ ಪರಿಶೀಲಿಸಬೇಕು.  ಗಮನಿಸಬೇಕಾದ ವಿಷಯವೆಂದರೆ ಗೋಚಾರೀ ಗ್ರಹಗಳ ಪರಿಭ್ರಮಣದ ಪರಿಣಾಮವಾಗಲಿ ಮಹರ್ದಶೆ ಅಂತರ್ದಶೆಗಳ ಪರಿಣಾಮವಾಗಲಿ ಕೆಲ ಅವಧಿಯವರೆಗೆ ಮಾತ್ರ... ಎಷ್ಟು ಅವಧಿಯವರೆಗೆ ಎನ್ನುವುದನ್ನು ನಮ್ಮ ವೃತ್ತಿ ಬಾಂಧವರಿಗೆ ತಿಳಿಸಿ ಹೇಳಬೇಕಾಗಿಲ್ಲ ಅನ್ಕೋತೀನಿ.. 

ಪ್ರಸ್ತುತಃ ಆರೋಗ್ಯ ದೃಷ್ಟಿಯಿಂದ ಯಾವ ಯಾವ ಗೋಚಾರೀ ಗ್ರಹಗಳು ಅಶುಭ ಫಲ ಕೊಡುವವು ಯಾವ ಗ್ರಹಗಳ ಮಹರ್ದಶೆ ಅಂತರ್ದಶೆಗಳು ಅಶುಭ ಫಲ ಕೊಡುವವು ಎಂಬುದನ್ನು ನೋಡೋಣ..

೧. ಸೂರ್ಯನು ಗೋಚಾರಿಯಿಂದ ೧-೪-೮-೧೨ನೆಯವನಾಗಿ ಬಂದಾಗ ಶಾರೀರಿಕ ಪೀಡೆ ಕೊಡುವನು.

೨. ಚಂದ್ರನು ಗೋಚಾರಿಯಿಂದ ೪-೬-೮-೧೨ ನೆಯವನಾಗಿ ಬಂದಾಗ ವ್ಯಾಕುಲತೆ, ಶಾರೀರಿಕ ಪೀಡೆ, ಶತೃಪೀಡೆ, ಭಯ, ಭೀತಿ, ಮಾನಸಿಕವಾಗಿ ಉದಾಸೀನತೆ, ಅಸಮಾಧಾನದ ಪ್ರವೃತ್ತಿ ಉಂಟು ಮಾಡುತ್ತಾನೆ.

೩. ಕುಜನು ಗೋಚಾರಿಯಿಂದ ೧-೪-೮-೧೨ ನೆಯವನಾಗಿ ಬಂದಾಗ ಶಾರೀರಿಕ ಪೀಡೆ, ಶತೃಪೀಡೆ, ವಾಹನದ ಅಪಘಾತ, ಅಗ್ನಿಭಯ, ಚೋರಭಯ ಮೊದಲಾದ ಅಶುಭ ಫಲಗಳನ್ನು ಕೊಡುತ್ತಾನೆ.

೪. ಬುಧನು ಗೋಚಾರಿಯಿಂದ ೪-೬-೮-೧೨ ನೆಯವನಾಗಿ ಬಂದಾಗ ಶತೃವೃದ್ಧಿ, ರೋಗಬಾಧೆ, ಶಾರೀರಿಕ ಪೀಡೆ ಕೊಡುತ್ತಾನೆ.

೫. ಗುರುವು ಗೋಚಾರಿಯಿಂದ ೪-೬-೮-೧೨ ನೆಯವನಾಗಿ ಬಂದಾಗ ಶಾರೀರಿಕ ಪೀಡೆ, ರೋಗ ವೃದ್ಧಿ, ಚಿಂತಾತುರತೆ, ವ್ಯಾಕುಲತೆ ಮೊದಲಾದ ಅಶುಭ ಫಲಗಳನ್ನು ಕೊಡುತ್ತಾನೆ.

೬. ಶುಕ್ರನು ೩-೪-೬-೮ ನೆಯವನಾಗಿ ಬಂದಾಗ ರೋಗವೃದ್ಧಿ, ಶತೃಪೀಡೆ, ಶಾರೀರಿಕ ಪೀಡೆ ಮೊದಲಾದ ಅಶುಭ ಫಲಗಳನ್ನು ಕೊಡುತ್ತಾನೆ. 

೭. ಶನಿಯು ೧-೨-೪-೫-೮-೧೨ ನೆಯವನಾಗಿ ಬಂದಾಗ ಶಾರೀರಿಕ ಪೀಡೆ, ಶತೃಪೀಡೆ, ರೋಗವೃದ್ಧಿ ಮೊದಲಾದ ಅಶುಭ ಫಲಗಳು ಸಂಭವ.

೮. ರಾಹುವಿನ ಗೋಚಾರೀ ಫಲಗಳು ಕುಜನಂತೆ ದೊರೆಯುತ್ತವೆ.

೯. ಕೇತುವಿನ ಗೋಚಾರೀ ಫಲಗಳು ಶನಿಯಂತೆ ದೊರೆಯುತ್ತವೆ.

👉ಜಂಗಮಾಮೃತ ವೇ ಶ್ರೀ ಚನ್ನೇಶ ಶಾಸ್ತ್ರಿಗಳು ಹಿರೇಕೆರೂರ.✍️